ROACCUTANE 45.GÜN
Bu gün yenə həkimə getdim...
Kim məni görürsə üzümün təmizləndiyini, daha canlı olduğunu, ağardığını deyir. Özüm də təmizləndiyini hiss edirəm amma bu gün həkim baxanda "xoşum gəlmədi, üzün bunnan da təmiz olmalıdı"-dedi. Pis olmadım əslində,demək ki, bu dərman çox güclüdür. Buna sevindim.
İndi gəliy mənim müalicəmə. Artıq 1 ay 14 gündür ki Roaccutane dərmanını içirəm. Hal hazırda daxili olaraq vəziyyətim əladır. Səhər kaşa yeyirəm (Nesquik Fitnes) dərmanımı içirəm, günorta hər nə olsa allah verəndən amma ev yeməyi olmaq şərti ilə (abur-cubur olmaz) yeyirəm və axşam da yenə kaşa (Nesquik Fitnes) yeyirəm və dərmanımı içirəm. Gün ərzində 40mg doza içirəm (səhər 20mg, axşam 20mg). Gün ərzində 3LT su içirəm. İçməzsəm dilim-ağzım quruyar. Dərman ifrat dərəcədə susuzluq yaradır. Günlük meyvəmi də yeyirəm.
Başqa baş ağrısı, yorğunluq, sümük ağrıları kimi heç bir narahatçılığım yoxdur. Ara-sıra çimərkən burnumu təmizləyəndə az qan laxtası əmələ gəlir. Bu normaldır: burun qanaya bilər. Dodaqlarım fəna halda quruyur, qabuq bağlayır və soyulur. Dodaqlarım dəhşətli dərəcədə fəna haldadır. Amma həkimim bunun normal olduğunu və qorxulu heç bir şey olmadığını dedi.
Üzümün vəziyyəti mənə görə yaxşıdır, yəni əvvəlkindən yaxşıdır. Şəkildən də gördüyünüz kimi mənim ən çox çənəmdə aknelər (sivilcələr) vardı. Amma indi heç çənəmdə heç bir şey yoxdur. Sadəcə çox az qızartı var o qədər. Hələ ki quruma azdır üzümdə. Əvvəllər çox olurdu çənə hissəmdə quruma, qabığ əlindən çənəmi görmək olmurdu. Amma indi nə qabıq vaaaar nə də ki akne (sivilcə).
Birdə ki, axşamlar "ЯМ" mazını çəkirəm və ən azı 3 saat saxlayıram üzümdə.
Bu gündən bu qədər...

     Bu gün sizə öz müalicəmdən danışacam. Müalicəmə 28 aprel 2014-cü ildə başladım. Həkimim mənə ilk ayı 30 mg doza təyin etdi. Səhər saat 9-da yeməkdən sonra 20 mg kapsula, axşam saat 9-da yeməkdən sonra isə 10 mg kapsula qəbul edirdim. 9 gündən sonra yenə həkimin müayinəsinə getdim və həkimim dozanı qaldırdı. Artıq səhər də, axşam da 20 mg kapsula qəbul edirəm. Hər səhər oyanıram, üzümü OTAL sabunu ilə yaxşıca yuyuram (soyuq su ilə), üzümü qurulayarkən heç bir dəsmaldan istifadə etmirəm, qətiyyən olmaz,
salfetlə silirəm üzümü, sonra 0.05%-li Xlorqeksidin suyu ilə silirəm və 20 dəqiqə sonra isə Klindaçin T gelini üzümə vururam. Gün ərzində başqa heç bir şey vurmuram üzümə. Axşam da işdən evə qayıtdığımda çimirəm və yenidən eyni şeyləri edirəm. Unutmayın bu müalicədə ən önəmli şeylərdən biri də təmizlikdir.
    İndi isə sizlə 28 aprel 2014-cü ildə çəkdirdiyim şəkli paylaşacam. Müalicəyə başlamazdan əvvəl üzümün necə olduğunu görməniz üçün:

  

       ROACCUTANE 16.gün
    Artıq bu gün əks təsirləri yavaş yavaş hiss edirəm. Səhər oyandığımda az da olsa gözlərimin quruduğunu hiss etməyə başladım. Heç də xoş hiss deyil. Günəşin şüaları yorur məni. Amma hələ ki gözlərimə göz yaşı istifadə etmirəm, tezdir hələ.
     Dodaqlarım da daha çox qurumağa başlayıb. Səhər oyananda elə də incitmirdi amma günortaya doğru ağrılar hiss etməyə başladım. Dodağımın üzəri soyulmağa başlayır. Bu da yemək yeyərkən mənə əziyyət verir, incidir. Amma axşamlar yatmazdan əvvəl nəməndirici pamada çəkirəm, səhəri dodaqlarım çox yaxşı olur onda.
    Üzümdə də quruluq gedərək artır. Amma dözülməz deyil. Hətta üzümün qurumasına sevinirəm. İnşallah çox quruyar və qabıq bağlayaraq soyulmağa başlayar tez bir zamanda. 
    Üzümdə 4 ədəd fərqli-fərqli yerlərdə bir neçə gündür ki təpəcik kimi qırmızı rəngli, ucu olmayan aknelər (sivilcələr) əmələ gəlib. Belə bir akne (sivilcə) 5 gün əvvəl burnumun sağ yanında da əmələ gəlmişdi amma bir səhər oyandım ki o təpəcik yoxa çıxıb və onun əvəzinə o birilərdən bir az böyük bir qara nöqtəyə şevrilib.
    Burnumun üzərindəki xırda qara nöqtələr qabarmağa başlayır.
    Bunlardan başqa üzümdə olan aknelər (sivilcələr) quruyub və hamısı yara qərtməyi şəklində quru vəziyyətdədir. 
    Ayrıca səhərlər oyananda üzüm o qədər gözəl olur ki, parıldayır. Səhərlər heç bitməsin iştəyirəm o zaman :) 
    Bu dərmanı qəbul etməzdən əvvəl internetdə o qədər qorxunc şeylər oxudum ki. Bunlardan biri də guya bu dərmanı qəbul edənlər depresiyaya düşür, bütün günü heç səbəbi olmadan ağlayır, intahar edə bilər və s. Amma inanın mənə bunlar boş şeylərdir. Bu müalicəyə başlamazdan əvvəl çox pis günlər keçirirdim və ağlamadan yatmadığım gün olmurdu. İşdə bütün günü əsəbi olurdum. Müalicəyə başlayıb Roaccutane içdiyimdən bu günə qədər o qədər əsəblərim yerimə düşüb ki, o qədər rahat olmuşam ki, nə ağlamaq? heeeç ürəyimdən ağlamaq keçmir. Əksinə gülmək keçir ürəyimdən :) yəqin ki bu dərman mənim əsəb sistemimə fərqli təsir edir.
     Bu günlük bu qədər. Sabah görüşənə qədər...
   

   Salam… Mən Elnarə… 

   Bu səhifəni sizlər üçün yaratdım...

   Hal-hazırda bu yazdıqlarımı oxuyursunuzsa, əminəm ki, sizin də aknelərlə (sivilcələrlə) probleminiz 

var. İndiki dövrümüzdə bu xəstəlikdən əziyyət çəkən minlərcə insan var. Mən də bunlardan biriyəm. Hələlik ki :) 

 İllərdir üzümdəki ləkələrdən, qızartılardan, qara nöqtələrdən, irinli aknelərdən (sivilcələrdən) canımı qurtara bilmirəm. Özümü bildim-biləli bunlarla yaşayıram, yəqin ki,10 il olar.

    Hər həkimə getdim.Bütün analizlərdən keçdim. Hər müalicəyə əl atdım. Lasyonlarla, kremlərlə böyüdüm amma bu cəza bitmədi ki bitmədi. Və sonda Türklər demiş "pes etdim" . 

    Adi günlərdən biri idi. Yenə həmişəki kimi işdə oturub internetdə başımı qatıb vaxtımı keçirməyə çalışırdım və youtube.com saytında təsadüfən bir videoya rast gəldim. Marağımı çəkdi, baxdım. Video  ROACCUTANE adlı, dünyada məhşur olan bir akne (sivilcə) dərmanından bəhs edirdi. Əlbətdə ki bu video ilə yetinmədim və google.com üzərindən dərmanı araşdırmağa başladım. Onsuz da vaxtımın keçməsi üçün bir məşğuliyyət axdarırdım :) . 

    İnternetdə ROACCUTANE haqqında bütün hər şeyi araşdırdım və oxudum. Rusiyada və Türkiyədə (ancaq bu dilləri bildiyim üçün) bu dərmanı istifadə edənlərin hansı nəticələrlə qarşılaşdığını oxudum və sonda bu dərmanla müalicə olunmaq qərarına gəldim.

    İlk öncə bu sözləri altını çizə-çizə vurğulayım ki; "ROACCUTANE çox güclü dərmandır, hər adam bu dərmandan istifadə edə bilməz, mütləq həkim nəzarətində olunmalıdır və 100%-li effektli preparatdır".

    Mövzuya davam edəcəm amma ilk öncə sizi ROACCUTANE ilə qısaca tanış edim; 

    ROACCUTANE HAQQINDA

    Roaccutane ilk olaraq 1980-ci ildə çıxmış,1982-ci ildə isə Avropa və Amerika daxil olmaqla yanaşı istifadəsinə icazə verilmişdir.

    Roaccutane bu günə qədər 12 milyondan çox insan tərəfindən istifadə edilmiş və 100%-li nəticə vermişdir.

    Roaccutane 10 mg və 20 mg yumşaq jelatin kapsuladır.

    Roaccutane çox təsirli və ağır bir akne (sivilcə) dərmanıdır. Aknelərin (sivilcələrin) müalicəsində ən sonuncu və 100%-li nəticə verən bir dərman olaraq bütün dünyada bilinir və qəbul edilir.

    Bu müalicəyə başlamaq qərarını siz özünüz verməlisiniz.Çünki dərmanın çox əks təsirləri vardır: 

 1. Əgər düzgün istifadə edilməzsə dərman qaraciyərə güclü təsir edə bilər.

 2. Güclü baş ağrıları ola bilər.

 3. Burun içi quruyur, yara olur və qanayır.

 4. Cild çox quruyur və qabıq bağlayır.

 5. Saç tökülmələri ola bilər.

 6. Göz quruluğu olur və zaman-zaman artır.

 7. Bir müddət sonra gözlərdə görmə zəifləyə bilər.

 8. Əllərin üzərində quruluqdan qırmızı eqzemalar əmələ gələ bilər.

 9. Gün boyu yuxusuzluq, yorğunluq halları ola bilər.

 10. Dodaqlar şişir, quruyur, çartlayır, qızarır və yanır.

 11. Depressya, əsəb pozğunluqları, səbəbi olmadan ağlamaq kimi psixoloji təsirləri vardır.

 12. Bel, boyun, ayaq və oynaqlarda sümük ağrıları ola bilər.

    Bunlarla bitmədi, əlbətdə ki Roaccutane kimi güclü bir dərmanın bundan başqa da əks təsirləri var. Ən önəmli olan da bu müalicəni olduğun müddət və müalicədən sonra 1 il yarım kimi müddətdə qətiyyən hamilə qalmaq olmaz. Ona görə bu müalicəyə başlamaq qərarını ancaq və ancaq siz özünüz verməlisiniz.

    Bu əks təsirlərin hamısı müalicə bitdikdən sonra zamanla əvvəlki vəziyyətinə dönür və hətta əvvəlkindən də yaxşı olur. Ona görə bu əks təsirlərin heç biri sizi qorxutmasın. Əminəm ki bir necə ay bu əziyyətə dözmək olar nəinki bir ömür boyu bu üzdəki iyrənc irinlərə dözmək.

    Əks təsirlərindən birinin də əgər düzgün istifadə edilməzsə, həkim nəzarətində olmazsa dönüşü olmayan bir qaraciyər zədələnməsinə gətirib çıxarar. Yox əgər düzgün istifadə edilərsə onda qətiyyən heç bir qorxusu yoxdur. Bu günə qədər də görülməmişdir. Əlbətdə ki, bu dərmanla müalicəyə başladınsa həm də diyeta tutmalısan. Bu diyetanı da araşdırdım və sizlərlə də paylaşmaq istəyirəm:

    QARACiYƏR QORUYUCU DiET

    Yediyiniz şeyləri yavaş yeyin və yaxşı çeynəyin.

    Yeməklərin və içkilərin çox isti və ya soyuq olmamasına diqqət edin.

    Az və sıx qida qəbul edin.

    Siqaret çəkməyin, spirtli içki içməyin və saqqız çeynəməyin.

    Bol maye için (gündə 2 ltr-2.5 ltr).

    Yeməklərdəki və süfrədəki duzun miqdarını azaldın.

    Tərkibinin nə olduğunun bilinməyən hazır qidalar yeməyin.

    Çox yağlı, acı, şirin, duzlu, turş yeməyin.

    Meyvənin suyunu içmək əvəzinə meyvənin özünü qabığı ilə birlikdə yeyin.

    Həftədə ən az 2 gün balıq yeyin.

    Qızartma yeməklərdən uzaq durun.

    Süd məhsullarının yağsızını (light) tərcih edin.

    Mayonez, ketçap, şokolad, krem, dönər, çipsi, qazlı sular, fındıq-fıstıq kimi şeylər, çox yağlı şirniyyatlar yeməyin.

    Çox yağlı qırmızı ət, içliklər (qaraciyər, beyin, böyrək, dil, dalaq, ürək), toyuq dərisi, kolbasa, sosiska, basdırma kimi şeylər yeməyin.

    Çörək və taxıllar: hamısı sərbəst.

    Yumurta: həftədə 1 ədəddən artıq olmaz.

    Pendir: az yağlı və 2 kibrit qutusu böyüklüyündə.

    Tərəvəz: bol yeyin.

    Meyvə: hər növ meyvə olar.

    Şirniyyatlar: az yağlı və az miqdarda olmaq şərtiylə.

    İçkilər: kimyəvi qatqısı olmayan və qazsız, spirtsiz olmalı.

    Yağlar: ancaq bitki yağları olar və az bol olmamaq şərtilə.

    Kofe: qətiyyən olmaz.

    Çay: yaşıl çay məsləhətlidir, zərər verməz.

    Turşu (tutma): bu kimi asitli qidalar olmaz.

     Xülasə, bunlar müalicəyə başlamazdan əvvəl araşdırdığım məlumatlardır. Bütün interneti alt üst etdim və müalicəyə başlamazdən əvvəl özümə bir LİSTƏ hazırladım. Artıq hər şeyi gözə almışdım, hər əziyyəti çəkməyə özümü hazırlamışdım. qalmışdır sadəcə bir məsəslə; Azərbaycanda bu dərman varmı və bu dərmanla içləyə bilən həkim varmı. Başladım araşdırmağa. Özüm aptek daxilində işlədiyim üçün aptek işlərinin içindəyəm, ona görə də

elə başlanğıc olaraq dərmanın Azərbaycanda olub olmadığı ilə maraqlanmağa başladım. Bütün tanınmış apteklərə zəng etdim. Hansı aptekə zəng etdimsə bu dərmanın onlarda olmadığını, nəinki aptekdə hətta firmada belə olmadığını dedilər. Sonunda inad etdim və tapdım. AVİS aptek bu dərmanı Azərbaycana gətirən tək aptekdir. Axır ki dərmanı tapdım. Bu dərman Azərbaycana gəlirsə demək ki bu dərmanla işləyən həkimlər var. Avisdə yaxın adamım işlədiyi üçün bu həkimi tapmaq mənim üçün heç də çətin olmadı. Bir zəngimlə Roaccutanla işləməyi bacaram ən yaxşı həkimi tapdım. Vaxt itirmədən həkimlə görüşə yazıldım və qəbuluna getdim. Otağa keçdim və həkim mənnən nə üçün gəldiyimi soruşanda, mən: " mən Roaccutanla müalicə olunmaq istəyirəm və Azərbaycanda bu dərmanla işləməyi bacaran ən yaxşı həkimin siz olduğunu araşdırdım tapdım" - deyəndə həkim nəsə duruxdu. Çünki indiyənə qədər heç kim öz ayağı ilə Roaccutane müalicəsinə gəlməyib. 

     Həkim məni analizləri verməyə göndərdi, bütün analizlərdən keçdim və düz 1 həftə analizlərin cavabının necə çıxacaxını və həkimin mənə bu müalicəni yazıb-yazmayacağını gözlədim. Ürəyim partladı gözləyənə qədər :)

     Və nəhayət 1 həftə keçdi və yenidən həkimə getdim. Bütün analizlərimin cavabı əla çıxdı, tam olaraq bütün orqanlarım sağlamdır. Sadəcə məni düşündürən bir şey oldu. Mən bu günə qədər çox həkimlərə getdim və hansı həkim üzümə baxırdısa üzümdə GƏNƏ (el dilində) olduğunu deyirdi. Amma heç biri analiz götürmürdü. Həkim məni gənə analizinə göndərəndə getdim və kipriyimdən,üzümdən analiz alındı. Yanımda dəfələrlə yoxladılar və üzümdə heç bir gənənin olmadığını dedilər. Hətta özləri də buna inana bilmədilər. Çünki üzümdəki bütün əlamətlər gənənin əlamətləri idi. Və beləcə üzümdəkinin gənə yox sadəcə AKNE (SİVİLCƏ) olduğunu öryəndim. Ba buna çox sevindim :) ...Bunları sizə ona görə yazıram ona görə ki, analizdən keçməmiş qətiyyən üzünüzdəkilərin nə olacağını bilə bilməzsiniz. Bu mümkün deyil. 

     Əlbətdə ki bunu bildikdən sonra aknenin (sivilcənin) də nə olduğunu araşdırdım. Sizlər üçün bu məlumatı da paylaşım:

     AKNE (SiViLCƏ)

     Çox sıx qarşılaşdığımız cild xəstəliklərindən biri olan akne (sivilcə), yağ vəzlərinə aid bir xəstəlikdir və əsasən yetkinlik dövürlərdə başlar, müalicə edilmədiyi təqdirdə qalıcı izlər buraxa bilər. Dərinin yağ əmələ gələ biləcək baxımından yüksək olan bölgələrdə çıxar və dəridə qırmızı akne (sivilcə), kist, qara nöqtə şəklində özünü göstərir.

Çox hallarda 12-20 yaşlarda ortaya çıxsa da, həm qadınlarda, həm də kişilərdə hər yaşda görüləbiləcək bir xəstəlikdir. Indiki dövrümüzdə insanların 80%-də bu xəstəlik vardır.

     Yetkinlik dövründə cild altındakı yağın miqdarı artar və yağ vəzləri pozular. Yağ vəzlərinin kanallarında bir tıxac əmələ gələr və bu tıxacın başı sərtləşib qaralar (qara nöqtələr). Bəzən kanal tıxalı olduğu halda vəzlər yağ istehsal etməyə davam edər beləliklə içi yağ dolu bir kist əmələ gələr. Nəticədə cilddə iltihablı, qırmızı şişlər əmələ gələr.

Akne (sivilcə) qızarar, şişər, iltihab əmələ gətirər, uzun bir zaman keçsə belə partlayar və içindəkilər xaricə axar.

Aknenin (sivilcənin) fərqli növləri vardır. Bəzən qara və ya ağ nöqtələr şəklində görünür. Bu çox hallarda xəstəliyin yüngül forması hesab edilir. Bəzən də ağrı hissi verə bilən böyük və sərt kistlər şəklindədir. Iltihablı sivilcələr də vardır.

     Günəş işığı aknelərin (sivilcələrin) yaxşılaşmasını asanlaşdırır. Ancaq uzun müddət günəşdə qalmaq cilddə ləkələr əmələ gətirə bilər. Həm də tərləmək akneləri (sivilcələri) artırar.

     Akneləri (sivilcələri) gizlətmək üçün mövbə-növ makiyajlardan istifadə etmək xəstəliyin daha da pisləşməsinə yol açar və akne (sivilcə) artar. Çünki dəridəki məsamələr makiyajla tıxanır və cild nəfəs ala bilməyib pozulur.

Stres və fikir də aknenin (sivilcənin) artmasına səbəb olur. Stres tələbələrdə imtahan zamanlarında artar. Bu vaxtlar aknelər (sivilcələr) də artmağa başlayar. 

     Xanımların menstruaçiya dövürlərində də aknelər (sivilcələr) arta bilər. Çünki hormonun miqdarı dəyişdiyi üçün akneləri (sivilcələri) əmələ gətirir.

     Var olan akneləri (sivilcələri) sıxmaq, vəziyyəti daha da ağırlaşdırır. Həm cildə zərər verir, həm də akneləri (sivilcələri) artırır. Sıxıldıqdan sonra dəridə yara vəziyyətində iz qala bilər. Sağalması da uzun müddət alır.

Akne (sivilcə) müalicəsi uzun müddətli olur və gec sağalır. Müalicəyə gec cavab verən bir cild xəstəliyidir. Səbirli olmaq lazımdır və mütləq həkimə müraciət etmək lazımdır.

      Artıq mən Roaccutane müalicəmə başlamışam. Belə qərara gəldim ki, bu müalicənin hər gününü mənim üzümdə nələr baş verdiyini sizlərlə paylaşım, bəlkə də sizin də bu müalicəyə başlayıb üzünüzün təmizlənməsinə köməkçi ola bilərəm. 

      Şəkillər də paylaşacam və sizə bu müalicəni gün olaraq yazacam.

P.S. Bütün suallarınızı asanlıqla yaza bilərsiniz. Sizə əlimdən gələn köməyi etməyə hazıram...